തിരുവല്ല നഗരത്തിൽ പന്നിയും മുള്ളൻപന്നിയും

തിരുവല്ല: കാട്ടുപന്നികളും മുള്ളൻപന്നിയും തിരുവല്ല നഗരത്തിൽ. റെയിൽവേ സ്റ്റേഷന് സമീപം വൈഎംസിഎ-തീപ്പിനി റോഡിൽ റെയിൽവേ ഓവർ ബിഡ്ജിന് അടുത്താണ് കഴിഞ്ഞ ദിവസം മുള്ളൻ പന്നിയെ കണ്ടത്. തിരുവല്ലയിൽ പന്നി ശല്യവും രൂക്ഷമാണ്.

വ്യാഴാഴ്ച രാത്രി പത്തുമണിയോടെയാണ് മുള്ളൻ പന്നിയെ റോഡിൽ കണ്ടത്. തീപ്പിനി സ്വദേശിയായ ബിബിൻ ചാക്കോ കാറിൽ വീട്ടിലേക്ക് മടങ്ങും വഴി മുള്ളൻ പന്നി കാറിന് കുറുകെച്ചാടുകയായിരുന്നു. ബിബിൻ  മൊബൈൽ ഫോണിൽ മുള്ളൻ പന്നിയുടെ ദൃശ്യങ്ങൾ പകർത്തി. കാറിൽ നിന്നുള്ള വെട്ടം അടിച്ചതോടെ മുള്ളൻ പന്നി സിഎസ്‌ഐ പള്ളിക്ക് സമീപത്തെ കാട് നിറഞ്ഞ പുരയിടത്തിലേക്ക് ഓടിക്കയറി.

കാട്ടുപന്നികളെ മുത്തൂർ, തിരുമൂലപുരം എന്നിവിടങ്ങളിൽ മുമ്പ് കണ്ടിരുന്നു. മുത്തൂരിൽ ആറ് മാസം മുമ്പ് കാട്ടുപന്നിക്കൂട്ടത്തെ ഷൂട്ടർമാരെത്തി വെടിവെച്ചുകൊന്നിരുന്നു.